آذر شهیدلرینین اولو روحونا تقدیم اولونور- گنجعلی صباحی

آذر شهیدلرینین اولو روحونا تقدیم اولونور- گنجعلی صباحی

حاضيرلايان : توتقون

دوشنبه , 18 آذر 1387

سحره ياخين ايدی. گؤزتچينين قیفيلا سالديغی ايری آچار سوكوتو پوزدو. قاپی بئينی جيرماخلايان بير صدا ايله آچيلدی. كشيكچی افسر ايچری گيردی. اونون دالينجا، ايكي مسلح پليس بير حالدا، قاپينين ساغ- سولوندا داياندی. سسه آييلانلار ياريم يوخولو حالدا، قيزارميش گؤزلرينه هيولا شكلينده گؤرونن اؤلوم جارچيسينين، كيمين آدينی جار چكه جگينی گؤزله ييرديلر.افسر هامينی گؤزدن كئچيرتدی. سونرا، هله شيرين يوخودا اولان ا‍‍ژدره ياخينلاشيب، تپيكله ووروب اونو اوياتدی.

- دور پالتارلارينی گئی، تئز اول! دئيه، امر وئردی..

گئجه لر محبوسلاری يوخوسوز، گيج بير حالدا چاغيريب دانيشيغا آپارماق، ايشكنجه وئرمك، مستنطيقلرين هميشه كي ايشي ايدی. آنجاق اژدرين هارا آپاريلديغی مبهم ايدی. چونكو اونون اؤلوم حؤكمو اوزونه اوخونموشدو. اونو آپارديلار، يوخوداكيلاردا اويانميشدی، يوخو گؤزلردن چكيلدی. بئينلر قارا، قورخونج فيكيرلرين جولانگاهينا دؤندو. دقيقه لرايله دوندو. نهايت، هاوا ايشيقلاندی، گون چيخدی. آنجاق، اژدر قاييتمادی.

ساعات سككيزی ووروركن، قاپی يئنه آچيلدی. گؤزتچيلر اژدرين يورغان-دؤشگينی و پالتارلارينی ييغيشديريب، آپارديلار. بو اؤلوم خبري ايدی. دئمك، اودا دار آغاجينا تاپشيريلدی.

قاشلار چاتيلميش،اوركلر شيدتله چيرپينيردی. كيمي ديزلريني قوجاقلاييب اؤز گله جه يينی دوشونور. كيمی، اؤز هيجانينی سوندورمك اوچون دوداقلارينی گميرير، كيمی ده قدم ووروردو. اوره ك سيخان بوغوجو بير سوكوت حكم سورمكده ايكن، غلامرضانين ياواش – ياواش زمزمه ايله باشلاديغی :



بيز دونيانين قورخو بيلمز بير قهرمان ائليييك ،

آلوولاردان يارانميشيق ، آذربايجان ائليييك !

يوردوموزو ياشاداجاق آديميزلا - سانيميز ،

تاريخلرين زينتی دير شؤهرتيميز ، شانيميز !



و الا... ائل ماهنيسينی گئتديكجه بويوك بير خور دسته سينه چئوريلره ك، زندان محيطينی توتدو. نغمه قورتارديقدا، غلامرضا دولغون، معنالی باخيشلارينی چهرلرينی غم توزو اؤرتموش يولداشلارينا گزديره رك ، بير نقطه ده بوشلوقدا ساخلادی. هيجانلا،

- عزيز دوستوموز! سن ، اي خالقيمين دوغما مبارز اوغلو ! سن وطن آزادليغي اوغروندا دار آغاجينا تاپشيريلدينسا، مبارز اينسانلارين اوره يينده هميشه ياشاياجاقسان! عشق اولسون سنه! دئديكده ، اونون سسی ، يولداشلارينين وئرديی " عشق اولسون! " دئيه جاوابلا، بوتون زيندانا ياييلدی.جاويدان سوزونه داوام ائده رك.

- قوي آزغين دوشمن بونو آنلاسين كي ، قوللاردا سسله نن زنجيرلر، ايشكنجه لر، مينلرله آخيتديقلاري گناهسيز قارداش قانی ،نده دار آغاجلاری بابك نسلينی اؤز آزاد ديلك و ايستكلريندن آييرا بيلمه يه جكدير! بو ائللرين شاهينلری هميشه اؤز آزادليقلاری اوچون ووروشموش، دوشمنه باش اگمه ميش، تاريخلرين زينتی اولموشدور. بيزجه اؤلوم يادلارا باش اگيب ياشاماقدان چوخ شرفلي دير! دئييب، بير آز داياندي. گؤزلری طوفانلي دنيزلر تك، دالغالی ايدی . ساكيت بير تونلا سوزه باشلادی :

- من ايندييه كيمي حاقيمدا اوخونموش حؤكمو سيزدن گيزله ديرديم. اؤلوم دار آغاجی منيده گؤزله يير. منده يولداشلاريميز كيمی ، اؤلومو گوله گوله قارشيلاياجاغام. من بونا اينانيرام كي ، من و اژدرلر اؤلسه ده ، آرزو وديلكلريميز آزادليق سئون اينسانلارين اوره يينده ياشاياجاق. گله جك بيزلري محبتله ياد ائده جك! من ايسته ييرم كی ،‌اؤلوم خبريم سيزه چاتاندا ، مني گؤز ياشی ، پريشانليق ايله يوخ، ملی سرودلا ياد ائده سيز، دئدی.

گون باتماغا آز قاليردی . سحردن بری اوتاغا چؤكموش ياس بولودو هله ده چكيلمه ميشدی. قاپي آچيلدی. كئشيكچی ،افسر، غلامرضا جاويدان ! دئيه سسلدی. بو سسدن ديكسينميش كيمی ، هامی آياغا قالخدی . هر طرفدن افسره دوغرو آدديملار آتيلدي. ائله بيل كي هرنفر "‌منم" دئيه اؤزونو جاويدانين يئرينه تانيتديرماق ايسته ييردی. افسر اولكموش كيمي اولدو. قورخودان تاپانچاسينی قينيندان چكه رك ، قاپييا طرف جكيلدی . گؤزلرده غضبله دولو اعتراض دويولوردو. يولداشلارينين آرخاسيندا قالميش جاويدان، اللريله اونلاري گئری ووراراق ايره لی كئچدی.

او قيرخ ياشيندا ، اورتا بويلو ، قالين قارا قاش ، كسكين باخيشلی ،انلی كوره ك ، ايگيد بير آدام ايدی. يولداشلارينا دونره ك ،

نيه متاثر اولدونوز؟ دئيه، سوال وئردی. بير آندا دوداقلاريندا قيميلدانان تبسم غضبه چئوريلدی. يوخ ! دئدی .- دوشمن قارشيسيندا پوزولماق قورخاقلارا ياراشار سيزه يوخ ! بير بير اونلارلا ال وئريب ، اؤپوشدو.

رحيمين هاميدان آرتيق دوتولدوغونو، دولغون گؤز ، چاتيلميش قاشلاريندان آيدين گؤرمك اولاردی. او بيردن اؤزونو جاويدانين قوجاغينا آتدی. بلی ! بو ايكی هم پيمان ، ايكی مبارزين سون گؤروشو ، ابدی آيريليغی ايدی.

غلامرضا قاپيدان چيخاركن، بيرده دونوب اونلارا حسرتله باخدی. يئنه دوداقلاريندا تبسم اويناييردی.

- الوداع ! عزيز دوستلار ! دئييب . اوتاقدان چيخدی.

- الوداع ! اي وطنين شرفلی اوغلو! دئيه ، يولداشلارينين اوجالان سسی ايله قاپی باغلاندی.

محبوسلار دمير قفسده سيخيلان آصلان كيمي ، اوتاغا سيغماييرديلار. اؤز هيجانينی ، هره بير جور سوندورمه يه چاليشيردی.آرتيق او ، يوخ ايدی. آنجاق ، ياتديغی يئرده اؤزو يازيب ، دونه – دونه اوخودوغو شعر پارچاسی هله ده دوروردو. اونو اوخوماغا باشلايان صمدين احساساتلا دولو آهنگی ، هامينی اؤزونه گتيردی.



" قوي شاهيديم اولسون تاريخ يازانلار ،

آزادليق اوغروندا چكيلديم دارا ،

شرافتله اؤلدوم ، آنجاق باشيمي ،

ايمه ديم هئچ دونيادا جللادلارا !"



شهربانی اداره سی بويوك بير زيندانا چئوريلميشدی. اوتاقلار آغزينا قدر ايستينطاق آلتيندا ياتان گناهسيزلارلا دولموشدو . آدامين چوخلوغوندان اوتورماغا يئر يوخ ايدی. قاپی وپنجره لر هميشه باغلی اولدوغوندان ، ايی قوخودان باش پارتلايير، نفس آلماق اولموردو.كئشيكچيلر مسلح حالدا قاپيلاردا قدم وورور، آغير و يونگول مسلسللرايله ، نيظامی قووه لر شهربانينين دوره سينی آلميشديلار.بوآغيرمحيط اؤزيئرينده،گئجه-گوندوز،آراسی

كسيلمدن اوتاقلاردان ايستينطاغا چاغيريشلار،سويوش-توهين وايشكنجه لرمحبوسلارين روحيني سيخير، بدبينلشديرير،حيات وياشايشا اولان اميدلرينی سوندوروردو.بعضيلری دئيلن بهتانلار،توهينلرقارشيسيندا

سوسور، جاواب وئرميرد ی .باشقالاری چيلغينلاشير،وورغون حالی آليردی.بوگئديش ايستر- ايسته مز هامينی دوشونمه يه ، يادلار – يابانجي لار الينه دوشدويونه اوره كدن يانير، بو وحشی لييين سونو نه اولاجاغينی فيكيرلرينده ووروشدورور،‌عايله لرينی فلاكت و قورخو ايچريسينده كئچينديكلرينی نظرلرينده جاللانديرير، سارسيليرديلار. چوخلاری دا – "يئنه ده می اسارته بويون ايمه لييك؟، يئنه ده می طالعيميزی يادلارا –ساتقينلارا تاپشيرماليييق؟" نه اوچون؟ نه اوچون؟! دئيه ، دوشونور، بئينلرينده دومانلی، قارا فيكيرلر آت چاپيردی. گونش داغلارين دالينا چكيلديكجه، سولغون ساچاغلارينی داغلاردان ، دوزلردن يغيردی. گئجه قارانليغی شهری قوينونا آلديقجا، زندان محيطينه قيزديرمالي بير سوكوت چوكوردو.بو دوزلمز ، بوغوجو سوكوت ايچريسينده گؤزله نيلمدن ، روحي اوخشايان گؤزل بير سسله،



" آنا يوردومسان اي گؤزه ل وطن ،

هميشه ليك ياشا آذربايجان !

گولوم، بولبولوم، بولبولوم، چمنيم،

هميشه ليك ياشا آذربايجان ! "



دئيه اوخونان نغمه هامييا تانيش ايدی. اوركلری اوخشايان بو سس –اؤلوم اينتيظاريندا اولان آزادليق قارتالينين سسي ايدی.اونون سسي قارانليغا سالينميش قوی بير نور كيمی، اوركلری ايشيقلانديريردی.

بدبينليك ، اميدسيزليك بولودونو تميزلدی. بو سس همين گئجه نين سحری دار آغاجينا تاپشيرماق اوچون، زنداندان- شهربانييه كوچورولموش غلامرضا جاويدانين سسي ايدی.

عموميتله اؤلوم حؤكمو آلتيندا ياتان محبوسلاراؤلومون ياخينلاشديغينی دويوركن، قورخويا دوشر، وحشت وارليغينی سارسيدار. ساغ ايكن اؤلوم توزو اوزونه قونار.لكن ، دارآغاجي –اؤلوم اونوگوزله يركن ، اوآزادليق ماهنيسينی اوخويوردو.



آذان سسلری شفق سوكوله جيينی بيلديريركن، شهربانينين قاباغيندا مسلح بير دست گؤروندو. گئجه سرخوشلوغوندان خومار گؤزلری قان چاناغينا دؤنموش افسر"دايان!" امری وئردی. بير نئچه نفر ايچری گيردی. گئجه نين سوكوتونو پوزان ماهنی سسی اونو حيرته سالدی. نوبتچييه دؤنه رك.

- بو بايغوشون سسی هله ده كسيلمه ييب؟دئيه، وئردييی سوالا نوبتچی تعظيم ائده رك،

- خير ، قوربان! او ، بوتون گئجه نی ماهنی اوخوماقلا كئچيريب، تك اوزو اولسا يئنه جهنم !

او باشلاديغی هر ماهنی ، دوستاقلار طرفيندن خورا چئوريليب. دئديكده ، افسرلييه بير گؤرونوش آليب،

- اونلارين سسينی آنجاق، اودلو اسلحه لر، دار آغاجلاری كسه بيلر. دئدی. قاپی آچيلدی.غلامرضا قوللاريندا قاندال ،غرورلا دورموشدو. افسر ايستهزالی بير تبسمله،

- بويورون جيناب! آمريكا فوقولو سيزی گؤزله يير. سيز اوخوماقدان دويماديغيز كيمی، دار آغاجلاريدا سيزدن دويمور. دئديكده ،او معنالي و كسكين بير باخيشلا ،

- من حاضرام! دئييب.گولومسه دي.افسر.

- اؤلوم آياغيندا ايكن ، يئنه ده گولورسن؟ دئيه كنايه لی بير حالدا سوال وئردی. جاويدانين بياقدان بری اوزونو ايشيقلانديران تبسم يوخ اولدو. نفرتله دولو كسگسن باخيشلارينی افسرين گؤزلرينه زيلله دی .

- شرف و ايفتيخارلا اوز-اوزه گليركن ،نه اوچون گولمه ييم؟ آلنيم آچيق ،اوزوم آغ، باشيم اوجادير، فقط ساتقينلارين اوزو گوله بيلمز! دئديكده، بو سؤزدن افسر توتولدو.رنگ وئريب - رنگ آلدی. خجالته اوخشار بير دومان اوزونه چؤكدو.چونكو، جاويدانين سون سؤزو اونون اؤزونه ايدی.او، " وطن و آزادليق!" دئيه دؤش قاباغا گرنلردن ايدی. آنجاق، دوشمنين اوستونلويونو دويوركن . چنلی، دومانلی بير سحر قاچيب، دوشمن دسته سينه قوشولموشدو.اؤز خلقينه، وطنينه خيانت ائتميشدی.جاويدانين سؤزونه جاواب تاپماديغيندان ، داريلميش حالدا،

- بويورون! دئيه اونا يول گؤستردی.جاويدان اونلارين قاباغينا دوشدو.يئنه اوزونو تبسم ايشيقلانديردی. هر طرفدن آوتومات و توفنگله اونون دوره سينی آلديلار.

- ايره لی! دئيه ، حركت امری وئريلدی.غلامرضا آتديغی ايلك آديملا ، آذربايجان ملی سرودونو اوخوماغا باشلادی. بو، اونون اؤز يولداشلاری ايله وداع ماهنيسی ايدی.اويانميش محبوسلار اونون سسينه سس وئريب اوخوماغا باشلاديلار. بو ايستيقبال اونو داها دا روحلانديردی. اؤز آدديمينی اوخونان ماهنی آهنگی ايله اويغونلاشديراراق ، بير سرباز كيمی شاخ آدديملارلا ايره ليلدی.

دؤرد آيدان بری قان حريصلرينين دوشگونلويو هله ده سؤندوره بيلمه ين دار آغاجلارينين ديبينده "دور!" امری وئريلدی.

سؤكولن دان يئرينده قارا بولودلار قايناشيردی. تبريز قارا دونونو آتماق ايسته ميردی.سانكی ،اوغلو اؤلموش آنا كيمی، ياس ساخلاماق ايسته ييردی. اسن كولك اوولتوسو، آرا بير اوچان قارغالارين قاريلتيسيندان باشقا ، بير سس ائشيديلميردی.غلامرضانين حؤكمو اوخوندو.دكتر معاينه سينی بيتيرديكدن سونرا ، حيرت ايچريسينده،

- گؤرونمه ميش ايشدير! قلبی عادی حالدا وورور. دئييب، اؤزونه اينانميرميش كيمی، يئنی دن بيرده اونو معاينه ائتدی.- بلی ! قلبی طبيعی حالدا وورور.دئيه سؤزونو تكرار ائتدی. بوحال سوست، هدفسيزلر اوچون تعجبلی اولا بيلردی.آزادليق اوغروندا چارپيشان سارسيلماز بير اينسان اوچون،يوخ!

او، ايل ياريم بوندان قاباق، اؤز فدايی دسته لرينه " اؤلوم، يا آزادليق!" دئيه ، قارتال كيمی، دوشمن اوزرينه شيغاييب، آنا تورپاغی غصبكارلاردان تميزلدييی زامان ، اوزونده غرور ، گؤزلرينده ظفر دالغالانيردی. بو گون دار آغاجينين ديبينده ده او، اؤز غرورينی الدن وئرمه ميشدی.قورخونج اؤلوم بئله اونو دئييشه بيلمه ميشدی.چونكو، او،اسارت آلتيندا،ننگين ياشاماقدانسا،اؤلومو اوستون توتور.او آزادليق عاشيقی ايدی. رسمی مراسيم بيتدی.سون سؤزه بئله باشلادی:- من دار آغاجی ديبينده ايكن ، يئنه ده اؤز خالقيمي سئويرم. وطنيمين ايستيقلالی و خالقيمين آزادليغی منيم آرزوم دور! دئييب، اوزونو ايشيقلانماقدا اولان شرقه طرف توتدو.- باخين! دئدی.-گئجه نين حؤكم سوره ن قارانليغينی ، چيخماقدا اولان گونشين نورو بوغور. بو بير حقيقت ايكن، ظلم –ستمين ابديلييينه كيم اينانار؟...دئييب ، دالغالی سسله



"ای وطنيم آذربايجان اودلار يوردوندان بير نيشان،

سن بويوتدون ستارخانلار آدلی سانلی كئچميشين وار.

قوجا شرقين چيراغی سان آزادليغين بايراغی سان.



و الا... اوخويوب، قورتارديقدا،

من حاضرام! دئدی. ايكی دقيقه كئچمه ميش ، دار آغاجی اونو ، وطن و خالقينين اليندن آلدی. او، اؤلدو. آنجاق آدی "جاويدان" اولاراق، آزادليق سئوه ن اينسانلارين اوره يينده ياشاييرو ياشاياجاق!



1330 شمسی

قايناق: حيات فاجعه لريندن ،گنجعلی صباحی،انتشارات دنيا، چاپ اول،1359 فروردين آيی

http://qaranfil.blogfa.com/post-38.aspx